Wie is Mirre

Ek is gebore op 15 Oktober 1955 in Bloemfontein as die tweede oudste van vyf kinders. Toe ek vier jaar oud is word my pa, wat al die jare ‘n Poskantoor man was, na Pretoria verplaas. My pa laat bou ‘n huis in Waverley in die Moot en ons woon daar en het die voorreg om ons skoolloopbane in een Laerskool en een Hoërskool te voltooi.

Ek besluit om Maatskaplike Werk te studeer en op besluit van my ouers registreer ek by die Hugenote Kollege in Wellington.  Voltooi my studies in 1976 en my eerste pos is in Bronkhorstspruit. Ek tree in die huwelik en die kinders se pa, wie saam my gestudeer het, word gevra om ‘n Welsynskantoor in Walvisbaai, Namibia te gaan vestig. Van daar is daar baie gebeure en ek trek, woon en werk regoor die land en uiteindelik na 40 jaar terug in Pretoria.

Terwyl ek in Windhoek woon studeer ek verder by die Universiteit Namibia.  Ek het drie kinders, was enkel Ma vir baie jare en toe ek 52 jaar oud is  ontmoet ek Chris Steyn, uiteindelik ‘n pasmaat, vriend en vertroueling.  

In 1992 begin ek met ‘n privaat praktyk en spesialiseer in aanneming en ‘n psigiatriese terapeutiese model - Rasionle Gedragsterapie.   Ek maak kontak met die Maxie Maultsby Jnr., die vader van RBT en nooi hom in 1995 na S.A  en in 1997 nooi hy my na Colombia, Suid Carolina, USA om deel  te neem aan die opleiding van sielkundiges, maatskaplike werkers, psigiaters en mediese personeel.  Ek bring die terapeutiese model na die maatskaplike werkers in SA en verwerk die inhoud en begin nasionaal en in Namibia maatskaplike werkers en sielkundiges oplei. Vandaar na die besigheids wêreld op nasionale vlak. Ek is die eerste maatskaplike werker wat post aanneming ondersteuningsgroepe begin het asook die eerste Maatskaplike werker met ‘n webblad vir aanneming.  Ek bring ook ‘n boekie uit aan ouers oor die begrip ‘telling’.

In 1993 begin ek my eie besigheid, OSH Consulting, en begin om werknemers welstands programme daar te stel met ‘n netwerk wat strek oor KZN en Oos Kaap vir Standard Bank, die Bloedbank  en ander kleinere maatskappye.  

In 2011 verhuis ons na ‘n klein plattelandse dorpie.  Daar het ek ‘n halfdag pos by ‘n welsyns organisasie wat werksaam is in die Bruin gemeenskap, gekry. Die mense, hulle omstandighede en die gebeurtenisse aldaar vat aan my hart en soos ek van die stories vertel,  begin ek vir my vriende  wat ver is van die verhale sommer epos… en die lekkerte om die stories wat ek sien gebeur op papier te sit… en nou is dit ‘n passie wat wil aanhou…